PCCL ELITE eight series-Cebu leg andam na
CEBU, Philippines - Lain na sab nga kulbahinam nga basketball action ang masaksihan sa mga Sugbuanon dihang ang Sugbo mo-host sa Philippine Collegiate Champions League (PCCL) Elite Eight Series-Cebu Leg nga gikatakda sa Nobiyembre 13-17 diha sa Cebu Coliseum.
Mao kini ang unang higayon nga ang Sugbo mo-host sa maong liga sukad namugna ang PCCL niadtong 2002.Si PCCL chairman Rey Gamboa nga maoy nangu sa pormal nga paglusad sa PCCL Elite Eight atol sa press conference kagahapon didto sa Hotel Fortuna sa dalan Borromeo, ning dakbayan.
Lima sa labing lig-on nga koponan gikan sa Manila ug ang top three teams sa Cebu Schools Athletic Foundation Inc. (CESAFI) ang magtigi alang sa nasudnong titulo.
Ang teams gikan sa Manila nga mopakita’g aksiyon naglakip sa UAAP Season 77 champion National University (NU) Bulldogs ug runner-up Far Eastern University (FEU) Tamaraws, ingon man ang NCAA season 90 champion San Beda College (SBC) Red Lions, runner-up Arellano University Chiefs ug usa ka qualifier gikan sa Luzon-Metro Manila elimination.
Ilang sukdon ang katakus sa CESAFI teams nga pangulohan sa 2014 champion Southwestern University (SWU) Cobras, runner-up University of San Carlos (USC) Warriors ug ang third placer University of the Visayas (UV) Green Lancers.
Ang mga koponan gibahin ngadto sa duha ka brackets. Ubos sa bracket A mao ang NU, Arellano U, USC ug Luzon-Metro Manila champion, samtang sa bracket B mao ang SBC, SWU, FEU ug UV.
Ang mokampiyon makadawat og P800,000, ang second placer P400,000 ug, ang third P300,000. Ang fourth makaangkon og P100,000.
Ang mga tiket nagkantidad og P200 alang sa lingkoranan sa stage, P150 sa lower box, P80 sa upper box ug P40 sa general admission. (BANAT PALARO)
- Latest
