Alin Brokers mihimo’g rekord sa BOC-CIPU

CEBU, Philippines – Mihimo’g tournament record ang Alin Brokers nga  mikulit og labing dakung iskor, 137-89 sa ilang duwa batok sa Global Carrier sa 3rd  BOC-CIPU Friendship Cup basketball tournament niadtong Lunes diha sa barangay Tinago gym, ning dakbayan.

Ilang nalabwan ang kanhi labing daku nga  iskor  sa MP Brokers nga 126 puntos dihang midaog sila batok sa Task Force sa miaging semana.

Ang team owner nga si Israel Alin  mihimo og  career-high nga 30 puntos aron pangulohan ang iyang koponan. Gisundan  ni Ryan Barral  nga mibagnos og 24 puntos, samtang  ang ex-USJR Jaguar nga si Miguel Tabaloc miamot og 19 puntos.     Sila si  Edwin Estorgio ug Jonas Cayanong parehong miiskor og 15 puntos alang  sa Alin Brokers.

Ang walay daog nga Global Carrier gipangulohan ni Elmer Miscala sa iyang 21 puntos.

Sa laing duwa,  ang CEI midaog batok sa Customs Task Force sa iskor, 97-85. (BANAT NEWS)