CEBU, Philippines - Gisuyakan sa Barangay Ginebra San Miguel ang Kia Sorento ug gilubong pa kini og 32 puntos, 87-55 sa PBA Philippine Cup kagabii didto sa Lucena City.
Human sa ilang come-from-behind nga kadaugan sa PBA opener batok Blackwater Elite, ang Kia nakasugat og tinuoray nga pwersa sa usa ka PBA powerhouse dihang gidabo-dabohan sila sa Barangay Ginebra.
Nakatilaw pa’g labaw ang Kia sa first period, 20-19, apan mao kadto ang katapusang higayon nga mihayag ilang paglaum nga makuha ang ikaduha nilang sunod nga daog dihang gitinuod sila sa Ginebra.
Gikan sa 43-22 nga labaw sa second period, ang Ginebra sa pagpangulo nilang Greg Slaughter, Japeth Aguilar ug Chris Ellis miratsada ug miinat sa labaw 67-42 paingon sa final period.
Si Slaughter ug Aguilar nagkumboya og 32 puntos, samtang si Jay-R Reyes ug Ellis miiskor og 12 ug 10 puntos matag usa alang sa Ginebra nga nagbitbit na karon og 2-0 nga baraha.
Si Rudy Lingganay maoy nangulo sa Kia sa iyang 14 puntos, samtang si LA Revilla, kinsa mirehistro og 23 puntos sa PBA debut sa Kia igo lang nakahimo’g siyete puntos alang sa koponan ni Pinoy boxing superstar ug playing coach Manny Pacquiao, kinsa wala moduwa aron mopokus sa iyang training alang sa umaabot niyang away batok ni Cris Algieri sa Nobiyembre 23 didto sa Macau. (BANAT NEWS)