Poblacion Occidental, Lamac sa finals
CEBU, Philippines – Gitagak sa Poblacion Occidental ug Lamac ang tagsa-tagsa nilang kaatbang aron maoy mag-abot sa kampiyonato sa Inter-Barangay Category A sa 2014 Mayor Teresa P. Alegado Fiesta Basketball League didto sa Tayud gym sa Consolacion, Cebu.
Ang Poblacion Occidental milubong sa Nangka sa iskor nga 88-63, samtang ang Lamac mipilde sa Pulpogan sa laing semifinal match.
Gikontrolar sa Poblacion Occidental ang duwa human sila molansang og 24-14 paghuman sa first quarter. Bisan pa niini, ang Poblacion Occidental padayon nga mirumbo sa Nangka aron moposte’g 25 puntos nga kadaugan.
Sa laing bahin, ang Lamac nabiyaan og sayes puntos sa halftime, 36-42, apan mibangon kini sa mosunod nga mga kuwarter aron makalingkawas gikan sa mga kamot sa Pulpogan.
Sa SK division championship, ang Jugan miangkon sa Game-1 batok sa Casili, 71-63 aron makauna sa best-of-three series.
Ang usa ka bulan nga torneyo usa sa mga highlights sa tinuig nga kapistahan sa ilang mahal nga patron San Narciso, gipaluyohan ni Mayor Teresa P. Alegado, Vice Mayor Rey Damole ug sa Sanggunian Bayan members. Si Councilor Nilo Ferraren mao ang sports committee chairman uban nilang Boy Tibon ug Association of Barangay Council President Marilou P. Casul.
Ang mga duwa gidumala ni sports commissioner Paul Alelu Q. Flores, kanhi Far Eastern University (FEU) cager. (BANAT NEWS)
- Latest
