NLEX Road Warriors gisubhan og daog, Global Port gipilde
CEBU, Philippines – Gisugat og daog ang NLEX Road Warriors sa labing una nilang duwa sa PBA pinaagi sa pagpilde sa GlobalPort Batang Pier, 101-96 kagabii sa PBA Philippine Cup didto sa Smart Araneta Coliseum.
Gipakita dayon sa NLEX ang ilang dakung tinguha nga makuha ang una nilang daog sa PBA dihang milansang sila og 16-6 nga labaw sa first period sa pagpangulo sa veteran Mac Cardona.
Apan wala makupti sa NLEX ang labaw dihang migukod ang GlobalPort ug milabaw pa’g dos puntos human sa tira ni Terrence Romeo, 22-20.
Misunod usab pagpanginit sa three-point area ang ubang guwardiya sa GlobalPort nga sila si Alex Cabagnot ug No.1 pick Stanley Pringle aron tapuson ang first half sa iskor nga 53-47.
Mi-rally ang NLEX sa second half ug sa pagpangulo nilang Asi Taulava ug KG Canaleta nailog nila ang labaw, 94-92 sa nahibiling 1:42 sa duwa.
Gikan didto wala na makabawi pa ang GlobalPort ug hingpit nang nasakiyo sa NLEX ang daog. Si Taulava maoy topscorer sa NLEX sa iyang 21 puntos, walo ka rebounds ug lima ka assists, samtang si Romeo miiskor og 34 puntos alang sa pilderong GlobalPort. (BANAT NEWS)
- Latest
