Tabla na SAB

CEBU, Philippines - Mas determinadong modaog ang University of San Carlos (USC) Warriors ug  nabuhi ang ilang kampanya alang sa ilang damgo

nga mosakmit sa titulo pinaagi sa pagpilde sa Southwestern University  (SWU) Cobras,  56-48 sa Game-4 aron mapugos ngadto sa

‘rubbermatch’ ang  best-of-five title series sa seniors division sa 14th Cebu Schools Athletic Foundation, Inc. (CESAFI) kagabii  diha sa

Cebu Coliseum.

Ang Game-5 himuon ugma sa alas-6 sa gabii.  

Si Shooster Olago maoy nangu sa Warriors human siya mobahog og 20 puntos, samtang si Kiefer Lim midugang og 12 puntos.

Naglabaw  ang Warriors og 15 puntos, 53-48 human sa basket ni Olago sa katapusang 2:34  sa fourth period, apan mihimo’g 8-0

run ang Cobras pinaagi sa duha ka basket ni Bendley Valdor ug laing duha ka basket ni Jovanie Luz aron mosikit ngadto na lang sa siyete

puntos. Nakabsan sila sa oras sa paghingpit sa maong rally tungod kay usa na lang ka minuto ang nahabiling oras ug nakuha sa Warriors

ang momentum sa duwa.

Sa unang higayon sa series, na-fouled out ang sinaligang import sa SWU nga  si  Landry Sanjo sa nahabiling 3:37  sa duwa diin

naglabaw ang Warriors og 13 puntos, 51-38 nga maoy usa sa rason nganong wala na makompleto sa Cobras ang  ilang  comeback bid.

Silang Sanjo ug Valdor maoy nangu sa Cobras sa ilang 11 puntos matag usa. Apan tungod sa maayong depensa sa Warriors

wala na sab makahuygo silang Mark Jayven Tallo, Jasper Parker ug Luz. Gani bokya sab silang Melvin Holper ug Daryl Goloran kinsa sayo

kaayong natawgan og unsportsmanlike foul.

Sayong naglabaw og nuybe puntos ang Cobras, 13-4, apan dali sab kaayong nakarekober ang Warriors ug mao na sab ang

naglabaw og nuybe puntos, 32-23 human sa duha ka free throws ni Victor Rabat.

Kun sama lang gihapon ang gipakita nga duwa sa Warriors ug dili mausab ang ilang game plan, hayan maputol na nila ang 58 ka

tuig nga kauhaw sa titulo sa collegiate league.

Puntos matag usa

USC (56) –  Olago 20, Lim 12, Rabat 9, Toyambi 6, Laude 3, Bensig 2, Tagapan 2, Magat 2. Pepito 2.

SWU (48) – Sanjo 11, Valdor 11, Bregondo 6, Mohammeed 6, Tallo 6, Parker 4, Luz 4. Halftime: 32-25. (BANAT NEWS)