Seniors finals: USC versus SWU

CEBU, Philippines – Sugdan karon sa University of San Carlos Warriors ang ilang titular campaign nunot sa dakong tinguha nga maputol na ang 56 ka tuig nilang pinaabot  kung kanus-a modaug pag-usab og kampiyonato sa ilang pagbalik sa Cebu Schools Athletic Foundation, Inc. (CESAFI) finals human mulabay ang pito ka tuig dihang ilang ikasangka karong gabii ang Southwestern University Cobras sa Game 1 sa ilang best-of-five title series diha sa Cebu Coliseum.

Niadto pang 2006 ug 2007 ang katapusang higayon nga miabante ang Warriors sa CESAFI  finals ug sa maong duha ka tuig, gipilde sila sa University of the Visayas Green Lancers.

Karon nga season, nagtabla ang Warriors ug ang Cobras sa elimination round sa 1-1 diin midaog sa first round ang Cobras, 69-67 ug nakabawos ang Warriors sa second round, 57-56.

Tungod kay sila maoy nahimong top two seeded teams human sa elimination, pareho silang naghupot og twice-to-beat advantage ug pareho sab nilang gi-knockout ang tagsa-tagsa nila ka karibal.

Gipalagpot sa Warriors ang Lancers samtang gipalagpot sab sa Cobras ang University of San Jose Recoletos Jaguars aron maoy magbagat sa best-of-five finals.

Daghan kaayo sa mga pangagpas o nagkadaiyang mga analysis nga kung sa higayon nga muabot ang duwa ngadto sa Game 5, seguradong maoy mohari ang Cobras tungod sa ilang championship experience diin upat na ka sagunson nga higayon silang miabante sa finals.

Sa una nilang pag-abante sa finals, napilde sila sa University of Cebu Webmasters ug milampos sila sa ikaduhang higayon diin ilang gipilde ang Lancers.

Sa miaging tuig, mapait nga kasinatian ang ilang nahiaguman nga gusto na nilang hikalimtan dihang hibaslan sila sa Lancers sa usa ka record win diin 2-0 na ang Cobras apan midaog og sagunson tulo ka duwa ang Lancers aron sakmiton ang ika-10 nilang titulo sa usa ka talagsaon"sweep in reverse" nga maoy unang hitabo sa kasaysayan sa CESAFI finals.

Dili ba buot pa sa Cobras nga balikon ang nangagi ug hinumduman ang maong kasinatian ug niining higayona, dili na sila mokumpiyansa bisag dili UV ang ilang ikasangka kay ang pag-abante sa Warriors ngadto sa finals, nagpasabot nga lig-on sab ang maong team busa kung mahimo, dili gyud hatagan og higayon nga makaginhawa og luag.

Ang kalamposan karon sa Warriors anha mag-agad sa duwa sa ilang foreign players nga si Shooster Olago, ang player gikan sa Cameroon kinsa mao All-Star MVP ug mao sab ang Slam Dunk Champion ug sa iyang partner nga taga Republic of Congo nga si Espoir Toyambi.

Makasalig sab ang Warriors kanilang Charles Pepito, Nico Magat, Victor Rabat, Christian Laude ug Kiefer Lim samtang ang Cobras adto mosandig kanilang Landry Sanjo, Bendley Valdor, Daryl Goloran, Benrie Bregondo, Mavin Holper Jasper Parker ug Mark Jayven Tallo. (GGM) (BANAT NEWS)