CEBU, Philippines - Nag-wild si Madrid sa third quarter diin miantog siya og 19 puntos aron maoy mangulo sa opensa sa Huskies, kinsa mibuntog sa Falcon, 89-82 sa Los Amigos Basketball Association (LABA) Commissioner’s Cup 2014 niadtong Biyernes didto sa Barangay Banilad gym, Mandaue City.
Sa kinatibuk-an, si Madrid mihipos og 32 puntos kansang sunod-sunod niyang nuybe puntos sa sayong bahin sa third period nakapasikit sa iskor, 47-49 sa nahabiling 5:50 sa maong kuwarter.
Nakatabla ang Huskies ni team owner Dr. Raul Monteroyo , 49-all human sa tira ni Richard Bathan sa oras nga 4:41 sa third period ug nasundan kini og duha ka sunod-sunod nga 3-pointer ni Madrid aron molabaw og kuwatro puntos, 55-51 sa katapusang 2:22 sa maong kuwarter.
Misikit ang Falcon ni team owner Arnold Pestaño, 71-72 sa three-point shot ni Richard Jordan sa tunga-tungang bahin sa fourth quarter, apan dali kining gitubag ni Madrid og laing 3-pointer aron inaton og balik ang ilang labaw, 75-71.
Nagkagidlay ang duwa sa Falcon dihang kalit nga mipatuman og trapping defense ang Huskies nga maoy gihimo nilang hagdanan aron makab-ot ang ilang ikaduhang daog.
Laing tulo ka teammates ni Madrid ang miiskor sab og double figures alang sa Huskies nga temporaryong nag-una sa standing bitbit ang 2-0 nga baraha. Ang 1-1 nga Falcon gipangulohan ni Marcial Marturillas pinaagi sa iyang 19 puntos, samtang si Glen Rostata miamot og 12 puntos.