CEBU, Philippines - Wa matarug si Pinoy boxing icon Manny Pacquiao sa bahad sa ubang PBA players nga pakit-on siya og unsay tinuod duwa sa pro basketball atol sa iyang pagsalmut sa liga isip playing coach sa Kia Sorento.
Si Pacquiao mopakita og limitadong duwa uban sa Kia tungod kay aduna pa siya'y nagsingabot nga sangka batok ni Chris Algieri sa Nobiyembre didto sa Macau, apan andam siya nga mobabad sa hardcourt human unya sa iyang away.
Pipila na ka mga PBA stars ang miingon nga dili nila hatagan og ‘special treatment’ si Pacquiao ug patilawon nila kini og usa ka pisikal nga duwa sa PBA.
Apan si Pacquiao wala malisang ug andam moatubang sa hagit sa mga PBA cagers. “Kaya naman, boxing suntukan 'yan eh, iyan pa kaya physicality in basketball banggaan lang,” matud pa niya sa Spin.ph.
Si Pacquiao miduwa sa labing unang pre-season game sa Kia niadtong Sabado apan napilde sila sa Blackwater Elite, 88-77 didto sa Laguna.
Sa maong duwa si Pacquiao igo lang nakahimo og uno punto ug usa ka rebound sa 10 ka minutos niya sud sa korte. Si Pacquiao gidepensaan sa veteran nga si Sunday Salvacion. Nakaatbang usab sa pambansang kamao ang Fil-Am guard nga si Chris Timberlake.