Lancers, Jaguars magtiwas

CEBU, Philippines - Sa katapusang higayon niini nga season, ang University of the Visayas (UV) Green Lancers ug ang University of San Jose-Recoletos (USJ-R) Jaguars dihang magtiwas kini sa deciding game sa ilang “best-of-three” series alang sa ikatulong dapit sa 14th Cebu Schools Athletic Foundation Inc. (CESAFI) basketball tournament karong adlawa diha sa Cebu  Coliseum.

Unang midaog ang Lancers sa Game-1 sa iskor nga  67-71  luyo sa mga paningkamot ni Jerome Mapao, kinsa miburak og 20 puntos niadtong Martes, apan ang Jaguars ubos sa pagpangulo ni Kevin Villafranca nga mihimo’g season-high 30 puntos, nakabawi sa Game-2 sa iskor nga 75-72 aron mapugos ang series ngadto sa rubbermatch.

Ang UV ug USJ-R magsangka sa alas-6 sa  gabii.

Sa pasiunang duwa sa alas-2 sa  hapon, ang Sacred Heart School-Ateneo de  Cebu (SHS-AdC) Magis Eagles mosuway pagbalik sa ilang winning track dihang ilang sangkaon ang University of Southern Philippines Foundation (USPF) Baby Panthers.

Ang Magis Eagles sa wala  damha  nabihag  ngadto sa Cebu Institute of Technology-University (CIT-U) Wildkittens, 60-57 niadtong Martes.

Naglaum sab  karon  ang Wildkittens nga masustineran nilang momentum, apan laing tungason nga dalan ang ilang subayon tungod kay ang ilang sangkaon ang UV Baby Lancers sa alas-4 sa hapon.

Mao sa’y tuyo sa Baby Lancers nga mokulit sa ilang ikaduhang daog sa second round aron pahugtan ang ilang kahigayonan sa pag-abante sa finals.