Larobis, Allied subha’g daog sa LABA CAGEFEST

CEBU, Philippines - Gisubhan dayon og daog ang team Larobis pinaagi sa paglubong sa AC Troopers, 86-72 sa nagpadayong aksiyon sa Los  Amigos Basketball Association (LABA) Commissioner’s Cup 2014 niadtong Miyerkules sa gabii didto sa Banilad Sports Complex sa  Mandaue City.

Si Canjo Echavez maoy nangu sa opensa sa Larobis ni team owner Bax Larobis nga mipabuhagay og 24 puntos.

Ang AC Sports ni SPO4 Dondon Coloscos kanunay untang naglabaw ug miabante pa  gani og otso puntos, 24-16 sa second quarter human sa basket ni Lloyd Chavez. Apan ang Larobis sa kombinasyon nilang Ouano, Gelbolingo ug Acusar hinay-hinay nga mikitkit sa labaw hangtod nailog nila ang momentum ug wala na kini molingi pa human moposte’g 42-39 nga bentaha sa halftime.

Kalit nga miburot ang ilang labaw sa third dihang misulod si Echavez, kinsa nagpatayohang lang og pamuntos ug halos tanang iskor  iyang giangkon. Si Echavez mipabuto’g 22 puntos sa maong kuwarter, apan wala na siya makabuylo’g maayo sa fourth quarter kay gihigpitan siya’g depensa sa mas gamay apan abtik nga si Pedot Dakay.

Misuway unta og gukod ang AC Troopers sa final period ubos sa giya ni Coloscos, apan pakyas sila pagtuman  sa ilang pangandoy nga kadaugan. Si Coloscos miiskor og 13 puntos aron pangulohan ang iyang team, gisundan nilang Linsay Bontilao ug Dakay nga adunay 12 puntos matag usa ug Joel Cabahug sa iyang 11 puntos.

Sa laing duwa, ang Allied ni team owner Chris Martenito, gisugat sab og daog human makaipsot batok sa MS Motosuit ni Lou Ornopia sa iskor nga 99-98.

Ang tinuig nga liga gipasiugdahan sa mga opisyales sa LABA ubos sa ilang maabtikon nga presidente nga si Christopher Ubas. Gipaluyohan sab kini sa Banilad Barangay Council ubos sa liderato ni Brgy. Capt. Greg Yap.

Ang mga duwa gidumala ni LABA Vice President for External ug Banilad barangay councilor Gilbert Sebandal. (BANAT PALARO)