VM Damole damgo makadiskubre’g bitoon sa fiesta league
CEBU, Philippines - Gipadayag ni Consolacion Vice Mayor Rey Damole nga ang pagpasiugda’g tinuig nga fiesta basketball tournament dili ang bugtong paagi paghatag og kalingawan sa ilang kabatan-onan, apan paagi usab alang kanila aron makakaplag og talento gikan sa ilang lungsod kinsa adunay potensiyal aron mahimong collegiate o propesyonal nga basketbolista ugma damlag.
“I hope that with this kind of endeavor, we will be able to develop hardcourt stars and hopefully discover a future PBA player from our municipality,” matud pa ni Damole atol sa pormal nga pagsugod sa 2014 Mayor Teresa P. Alegado Cup basketball tournament niadtong Domingo didto sa Consolacion covered court.
Sila si Damole, ingon man si Mayor Alegado ug Councilor Neil Ferraren mibubo sa ilang suporta sa usa ka bulan nga kompetisyon nga usa sa mga highlights sa tinuig nga kapistahan sa ilang mahal nga patron San Narciso sa Oktubre 29.
“Handling this event is a huge task and entails a lot of effort given the number of participants, but we're confident to finish the tournament on our target schedule,” sumala pa ni Ferraren, ang sports committee chairman, kinsa mopasiugda sab og football competition sa Oktubre 18 nga kabahin sa ilang grassroots development program.
Adunay 21 ka barangays ang misalmot sa maong torneyo. Kini mao ang Cansaga, Poblacion Oriental, Poblacion Occidental, Jugan, Pulpogan, Tayud, Lamac, Danlag, Pitogo, Nangka, Tugbungan, Casili ug Cabangahan sa inter-barangay category A ug Lanipga, Panas, Polog, Sacsac, Garing, Tilhaong, Panoypoy ug Tolo-tolo sa category B. May kategoriya sab alang sa SK.
Ang mga duwa pagahimuon sa mga gyms sa Cansaga, Jugan ug Tayud.
Si Ferraren pagaabagan nilang Boy Tibon ug Liga ng mga Barangay President Marilou P. Casul. Ang torneyo pagadumalaon ni league commissioner Paul Alelu Q. Flores, ang kanhi varsity sa Far Eastern University (FEU). (FREEMAN)
- Latest
