CEBU, Philippines – Milampos ang Barako Bull Energy Cola sa paglabni sa kampiyonato sa PBA-Leyte Cup dihang ilang gilamporas ang Gold Star Hardware, 66-58, kagabii didto sa Mandaue City Cultural and Sports Complex.
Ang Barako Bull midaog dihang sila ang mikolekta og labing daghang daog sa upat ka adlaw nga torneyo nga nagsugod sa Leyte ug natapos kagahapon didto sa Mandaue City.
Sa pagsuwat ning balita, kasamtangang nagsangka ang Barangay Ginebra San Miguel ug Meralco Bolts sa usa ka non-bearing game.
Daling gipakita sa Barako ang kalidad sa usa ka PBA team dihang milabaw dayun sila og double digits sa first period, 20-10, apan giinat pa nila kini sa 21 puntos nga maoy labing dakung labaw sa koponan sa first half.
Hinuon wa damha nga miratsada ang Gold Star dihang ginaug nila ang labaw sa dos puntos, 41-43, sa katapusang siete minutos sa third period sa pagpangulo ni Leomer Losentes.
Wala hinuon mawagtangi og konsentrasyon ang Barako ug subli silang mitukod og bangis nga rally ug sa pagpangulo ni Leo Najorda nainat nila ang labaw bali sa double digits, 58-45 sa 8:05 nga maoy nahimong yawi sa ilang kadaugan. (BANAT NEWS)