CEBU, Philippines - Suwayan sa top-seeded Sacred Heart School-Ateneo de Cebu (SHS-AdC) Magis Eagles pagpanalipod sa ilang limpiyong baraha sa dihang harungon nila ang second-ranked University of the Visayas (UV) Baby Lancers alang sa unang dapit sa juniors division semifinals sa 14th Cebu Schools Athletic Foundation, Inc. (CESAFI) basketball tournament karong adlawa diha sa Cebu Coliseum.
Ang Magis Eagles nga adunay 10 winning streak angayan magbantay tungod kay sa una nilang pagbagat, naka-eskapo sila ug igo lang nidaog og tres puntos, 74-71 atol sa elimination round niadtong Agosto 19.
Daan nang gitag-an sa mga CESAFI fans nga ang Magis Eagles ug ang Baby Lancers maoy magbagat sa best-of-three finals sa unang semana sa Oktubre.
Ang Magis Eagles mosandig ngadto sa ilang beterano ug labing kasaligang offensive player nga si Janjan Jaboneta, uban sa ilang ace point guard nga si Niño Araw-araw, shooting guard Joseph Mayol ug sa mga batan-ong kauban sama nilang Jose Pierro Dominic Longa, Zachary Lance Eden Huang, Joshua Sinclair, Kevin Brian Johnson, Steven Co, Andrew Velasco ug Alex Roeland Visser.
Mobalik na sab og duwa karon ang sentro nga si Adrison Gaviola, kinsa gipapahuway sa unang duha ka duwa sa semifinals tungod sa bun-og sa iyang tuhod. Ang iyang presensiya maoy makadugang kalig-on sa ilawom.
Sa habig sa Baby Lancers, mosalig sab sila sa tandem nilang John Carl Escalona ug Orlan Wamar uban nilang Theo Joshua Flores, Raul Jancork Cabahug ug Samuel Schaub alang sa ilang solidong starting unit.
Sayo karong hapon, usa kanila tali sa fourth-seed Cebu Institute of Technology-University (CIT-U) Wildkittens ug sa sixth-ranked University of Southern Philippines-Foundation (USPF) Baby Panthers ang makatilaw na gyud og daog.