CEBU, Philippines - Parehong nagtinguha ang topseeds Sacred Heart School-Ateneo de Cebu (SHS-AdC) Magis Eagles ug ang University of the Visayas (UV) Baby Lancers nga mokulit og 2-0 nga baraha karong adlawa dihang makigsangka sila sa tagsa-tagsa nilang karibal sa semifinals round sa juniors division sa 14th Cebu Schools Athletic Foundation, Inc. (CESAFI) diha sa Cebu Coliseum.
Ang Magis Eagles moharong sa University of Southern Philippines Foundation (USPF) Baby Panthers sa opener sa alas-5:15 sa hapon, samtang ang Baby Lancers makigbatok sa Cebu Institute of Technology-University (CIT-U) Wildkittens sa alas-6:45 sa gabii.
Ang Magis Eagles, kinsa miharos sa ilang walo ka duwa sa elimination, midaog batok sa Wildkittens, 82-75, samtang ang Baby Lancers misugod sa ilang kampanya sa semifinals uban ang 67-48 nga demolisyon batok sa Baby Panthers.
Unsa man ang resulta sa mga duwa karon, ang Magis Eagles ug ang Baby Lancers maoy mag-ilog sa unang puwesto sa first round sa semifinals karong Sabado. (BANAT NEWS)