CEBU, Philippines – Ang topseed Sacred Heart School-Ateneo de Cebu (SHS-AdC) Magis Eagles maoy unang nakadagit og daog batok sa fourth seed Cebu Institute of Technology-University (CIT-U) Wildkittens, 82-75 sa pagsugod sa semifinals sa juniors division sa 14th Cebu Schools Athletic Foundation, Inc. (CESAFI) kagahapon didto sa Cebu Coliseum.
Ning pagsuwat, ang no. 2 University of the Visayas (UV) Baby Lancers ug ang no. 6 seed University of Southern Philippines (USPF) Baby Panthers padayon pang nagduwa.
Gipapas sa CIT-U ang ilang 14 puntos nga biya didto sa third period, 49-63 human sa basket ni Jose Piero Dominic Longa. Apan misumbalik sila didto sa fourth quarter diin hinay-hinay silang misikit hangtod nga nakatabla sa duwa sa iskor, 65-all pinaagi sa basket ni Edgardo Henry Acop III, sa nahabiling 6:35 sa maong kuwarter.
Tungod sa teamwork, wala magkaguliyang ang Magis Eagles, kinsa mibawos og 8-0 run aron molabaw sab og otso puntos, 73-65.
Si Jajan Jaboneta, ang labing beteranong player sa Magis Eagles, maoy nangu sa kadaugan pinaagi sa iyang 27 puntos, samtang si Andrew Velasco miamot og 13 puntos. Silang Longa ug Zachary Lance Eden Huang mikabkab og 10 puntos matag usa.
Ang Wildkittens gipangulohan sab ni Justin Jules Langres, kinsa miratsada’g 21 puntos, gisundan ni Jeroel Pedrosa sa iyang 17 puntos ug nilang Joshua Philip Manatad ug Jasper Berezo nga adunay 10 puntos matag usa. (BANAT NEWS)