Baby Panthers abante sa semis

CEBU, Philippines – Naangkon sa no. 6 seed University of Southern Philippines Foundation Baby Panthers ang kataposang luna sa semifinals dihang ilang gipalagpot ang 3rd seed University of San Carlos Baby Warriors pinaagi sa pagkulit og 64-60 nga kadaugan kagahapon atol sa playoffs sa juniors division sa nagpadayon nga 14th season sa Cebu Schools Athletic Foundation, Inc. (CESAFI) didto sa Cebu Coliseum.

Ang Baby Panthers maoy bugtong team nga menos og seeding nga miabante sa semifinals human sab ilang gipilde ang Baby Warriors niadtong Sabado sa iskor, 57-47 aron makapugos og do-or-die battle alang sa ika-upat ug kataposang luna sa semifinals.

Si Ain Obenza maoy nangu sa Baby Panthers sa iyang 18 puntos ug midugang si Drexley Clyde Avacena og 14 puntos. Dihang misikit sa ikatulong higayon ang Baby Warriors, ang free throws nilang John Brylle Bahio ug Dennis Archival maoy nahimong insurance baskets alang sa Baby Panthers alang sa 64-60 nga kadaugan.

Midugang pa gyud og 13 puntos si Carl Carbajosa alang sa Baby Panthers kinsa maoy kanunay naglabaw bisan pa og naapsan sila human molabaw og 10 puntos atol sa halftime, 33-23.

Silang Jean Jacque Antigua ug Kent Malazarte maoy nangu sa Baby Warriors sa ilang 15 ug 11 puntos, matag usa.  (BANAT NEWS)