CEBU, Philippines -Makasaksi na usab og laing kulbahinam ug puno sa aksiyon ang mga Cebuano boxing fans dihang lima ka Singwangcha boxers ang mobida sa “Pinaksitay sa Talisay” card karong alas-7 sa gabii didto sa Talisay City Sports Complex.
Si Aguelo A. Singwangcha sa Maasin City maoy moaway sa main event batok ni Bonnie Makiling sa Bukidnon sa ilang 12-round bout alang sa Asian Boxing Federation super featherweight title.
Ang 26-anyos nga si Aguelo (21-10-2, 13KOs) mamawi gikan sa unanimous decision niyang kapildihan batok ni Mexican Sergio Thompson niadtong Agosto 8 didto sa Chetumal, Quintana Roo, Mexico.
Sa iyang bahin, si Makiling naglaraw na sab og daog human sa iyang third round stoppage batok ni Rege Pahayag niadtong Hulyo 27 didto sa Camiguin.
Gawas ni Aguelo, laing mga boksidor ni Thai boxing patron Naris Singwangcha nga moaway sa maong fight card nga gisuportahan sab ni Cebuano promoter Rex ‘Wakee’ Salud ug Talisay City Sports Commission mao sila si Canoy J. Singwangcha, Valero G. Singwangcha, Boyose A. Singwangcha ug Tabanao J. Singwangcha.
Si Canoy makigharong ni Ryan Bahala sa Davao City, sangkaon ni Boyose si Jaime Barcelona, samtang si Valero makigbinukbukay ni Arlon Batingal ug si Tabanao batok Joas Aparecio. Laing atngan mao ang featherweight showdown nilang Recky Dulay ug Anthony Sabalde.