3 PBA teams moduwa sa Cebu ug Leyte
CEBU, Philippines – Tulo ka PBA teams ang mopakita sa ilang katakus uban ang duha ka regional champions gikan sa Visayas ug Mindanao sa labing unang Cebu-Leyte Cup, usa ka charity basketball event alang sa mga biktima sa bagyong “Yolanda” sa miaging tuig. Pangulohan kini sa crowd-favorite Barangay Ginebra San Miguel uban sa Meralco Bolts ug Barako Bull Energy Cola.
Ang usa ka pocket-tournament gitakda sa Septiyembre 24-28 Ang duha ka commercial teams nga mohitsas sa mga torneyo mao ang defending champion sa Kadawayan Festival Invitational Cup Goldstar Hardware Davao ug Samsam Gullas team.
Sugdan kini didto sa Hinundayan gym sa Hinundayan Southern Leyte. Gawas sa duwa, ang mga fans makahigayon usab pakighimamat sa ilang mga idolo sa PBA, kinsa mangunay pag-apud-apod og mga relief goods. Sa Septiyembre 27, ang aksiyon motabok sa Minglanilla Gym sa Minglanilla, Cebu, samtang ang kampiyonato adto pagahimuon sa Mandaue City Cultural and Sports Complex sa mosunod nga adlaw.
“With this tournament, mabutang ang Leyte ug Minglanilla sa map of Philippine basketball,” matud pa sa basketball patron ug kanhi Cebu 1st District Representative Eduardo ‘Eddie’ Gullas atol sa press conference kagahapon didto sa Bayfront Hotel Cebu.
Ang mga tiket sa duwa sa Minglanilla nagkantidad og P150 sa upper box, P250 sa stage ug P500 sa ring side. Samtang sa Mandaue City mapalit kini sa tag P200 sa upper box, P400 sa stage, P500 sa lower box ug P700 sa ring side. Sa dugang mga pangutana ug ticket reservations, mahimong motawag sa numero 0923-7482110, 0922-5183771, 0917-6888890, 0998-3985159 o 422-8988. (BANAT NEWS)
- Latest
