CEBU, Philippines – Nabalaka si Smart Gilas Pilipinas point guard LA Tenorio nga mabag-ohan sila sa ilang kampanya sa Asian Games kay menos ra ang crowd nga moabiba kanila didto sa Incheon, South Korea.
Posible mabungog sila sa “boo” gikan sa mga South Korean fans tungod kay napilde nila ang national team sa maong nasud atol sa 2013 FIBA Asia Championship didto sa Manila. Ang Gilas wala nagkuwang sa suporta sa mga fans ilabi na sa mga Pinoy OFWs atol sa FIBA World Cup didto sa Spain.
“Majority in the Asian Games mga Koreans, eh malamang babawi yan sa atin, kasi nakita nila how we beat them dito sa home natin last year,” matud pa ni Tenorio sa Spin.ph.
Hinuon, si Tenorio miingon nga angay nga hatagan sa Gilas og pagtagad ang ilang duwa ilabi na nga lig-on ang ilang karibal nga South Korea.
Ang Gilas ug South Korea managlahi og bracket sa group stage, apan daku kaayo’g kahigayonan nga magkuros usab ang ilang dalan sa playoffs.
Ang Gilas mapiangan kay ang kadagkuan sa Incheon organizing committee wala motugot nga moduwa si NBA naturalized center Andray Blatche. (LPM gikan sa Spin.ph) (BANAT NEWS)