CEBU, Philippines - Nagpanikad na ang University of Cebu-ERCO Bro alang sa PFF-Smart National Club Championship nga gitakda karong Septiyembre 19-21 diha sa Cebu City Sports Center (CCSC).
Ang UC-ERCO maoy representante sa Sugbu alang sa group staging ning tuiga sa PFF-Smart NCC.
Si Engr. Rodney Orale, ang CFA Board member ug usa sa mga team owners sa UC-ERCO, nanghinaut nga dili na masibog ang umaabot nga kalihukan aron dili maapektahan ang ilang badyet alang sa tulo ka adlaw nga torneyo.
Ang karaang magduduwa sa Azkal nga si Ian Araneta ug laing player gikan sa National Capital Region (NCR) nga si Martin Ferrer ug laing lima ka langyaw’ng magduduwa apil sa line-up sa UC-ERCO.
Ang UC-ERCO nga nasakop sa Group B moharong sa Davao del Norte FA, nga maoy mihawod sa cluster A action ug Dipolog Football Club, ang second ranked team sa Mindanao.
Dili sama sa Mindanao, NCR ug Luzon, ang Visayas walay cluster action.
Ang PFF-Smart NCC ning tuiga adunay walo ka clusters diin ang top squad moabante sa group qualifiers.
Ang top five sa tanang lima ka grupo moabante sa national groupings uban sa top three teams sa miaging edisyon sa United Football League nga mao ang Kaya, Meralco ug Global.
Ang national groupings buk-on sa duha ka bahin diin ang top two teams moduwa sa crossover semifinals. Ang modaog magsangka alang sa national championships sa Nobiyembre 9 didto sa Rizal Memorial Stadium sa Manila. (BANAT PALARO)