Jaguars batok Wildcats

CEBU, Philippines - Suwayan sa University of San Jose-Recoletos Jaguars nga banhawon ang ilang kampanya alang sa semifinal sa dihang makigtakus  kini pag-usab batok sa Cebu Institute of Technology-University (CIT-U)  Wildcats  sa main game  sa 14th Cebu Schools Athletic Foundation, Inc. (CESAFI) basketball tournament karong gabii diha sa Cebu Coliseum.

Sa preliminary,  ang University of San Carlos (USC) Warriors moharong  sa nagsangkiig nga University of Cebu (UC) Webmasters sa ilang “non-bearing” game.

Sa higayon nga modaog ang Warriors, manghinaut  sila nga ma-upset ang Southwestern University (SWU) Cobras sa Jaguars  nga maoy bugtong purohan nga mahimo silang No. 1 inig human sa  double round elimination karong Sabado.

Segurado na untang tapuson sa Warriors ang numero unong pwesto kun  napilde pa ang Cobras sa ilang duwa batok sa University of the Visayas (UV)  Green Lancers niadtong Martes sa gabii.

Tungod kay  nakabaton na og “twice-to-beat” advantage sa sunod hugna, agad-agaron na lang ni USC coach Junthy Valenzuela  ang duwa sa UC.  Anaa ra sa iyang mga kamot kon hatagan og  taas-taas nga pahuway ang ilang imports nga silang  Shooster Olago ug Espoir Toyambi aron iandam ang ilang kaugalingon alang sa semifinals. (BANAT NEWS)