CEBU, Philippines – Subling mipakita sa iyang kapaspas ang Cebuana marathon queen nga si Mary Joy Tabal human siya midaog sa 16K division sa Run 4 Fun, Live to Give kagahapon didto sa The Terraces sa Ayala Center Cebu.
Si Tabal misutoy paingun sa finish line sa oras nga 1:03:36.69, gisundan nila ni Mereeis Ramirez (1:14:45.57) ug Keisha Mae Delechos (1:18:44.88) sa ikaduha ug ikatulong dapit.
Ang mga Kenyan runners nga sila si Isaac Simat ug Douglas Mwiti mao ang nagsunod sa una ug ikaduhang dapit sa 16K men’s class. Si Simat midaog sa oras nga 55:27.10, samtang si Mwiti maoy second placer sa oras nga 57:27.72.
Si Michael Largo misulod sa top three place sa men’s class sa oras nga 57:31.98.
Sama sa 21K men’s open, mga Kenyan usab ang naghari sa 8K class dihang midaog si Abraham Missos sa oras nga 27:13.85, samtang si James Mebei maoy anaa sa ikaduha sa oras nga 28:30.32. Si John Darryl Manus mipahiluna sa ikatulo sa oras nga 29:20.
Ang managsuong sila si Cherry (32:13) ug Lovely Andrin (36:28) maoy first ug third placer sa 8K women’s division, samtang si Ruffa Sorongon (32:24) maoy anaa sa ikatulong luna.
Si Michelle Beboso maoy midaog sa 4K women’s division sa oras nga 17:42, samtang si Robert Daang maoy midominar sa men’s open sa oras nga 13:44. (LPM) (BANAT NEWS)