ALA Boys nangharos didto sa Dubai
CEBU, Philippines - Midaog ang tulo ka ALA Boxing Gym fighters batok sa tagsa-tagsa nilang mga kaatbang sa labing una ug makasaysayanong “Pinoy Pride XXVII - Duel in Dubai” fight card sa miaging gabii didto sa Dubai World Trade Center.
Sa main event, ang undefeated nga si Genesis ‘Azukal’ Servania (25-0, 11KOs) milampos pagdepensa sa iyang WBO Intercontinental super bantamweight title human niya gipaundang ang Mehikanong si Jose ‘Matador’ Cabrera (22-5, 10KOs) sa 10th round.
Mihimo dayon og bangis nga ataki si Servania hinungdan nga sayo niyang napatumba si Cabrera gamit ang overhand. Si Servania wala mohunong og kulata ni Cabrera hangtod nga ang korner na sa Mehikanong boksidor ang misurender sa 10th round aron malikay sa peligro ang ilang boksidor.
Sa iyang bahin, si ‘King’ Arthur Villanueva nag-agi pa og kulba kay natuwang siya sa second round human maigo sa kusog nga suntok ni Nicaraguan Henry ‘El Crespo’ Maldonado. Nakarekober hinuon ang garbo sa Bacolod City nga si Villanueva aron tiwason ang duwa ug makuha ang split decision nga kadaugan.
Sa maong kadaugan si Villanueva (26-0, 14KOs) nagpabiling hari sa IBF International super flyweight, samtang si Maldonado nakahiagum sa iyang ikaupat nga pilde sa 23 ka professional fights.
Midaog usab sa undercard ang kanhi world title challenger nga si Rey ‘Boom Boom’ Bautista pinaagi sa majority technical decision batok ni Mexican Juan ‘Piquet’ Martinez.
Sa wala pa ang desisyon nga kadaugan, gipatumba una ni Bautista sa fifth round si Martinez gamit ang kombinasyon, apan ang Mehikano alistong mibangon.
Nagbinayloay og kinumo ang duha ka boksidor, apan nakahiagum og gisi sa tuong kilay si Bautista hinungdan nga giundang ang away. Sa iskor sa mga hurado, si Bautista naglabaw, 68-65, 67-65 ug 66-66. (BANAT NEWS)
- Latest
