Fajardo pasidunggan sa UC

CEBU, Philippines - Sentro sa Smart Gilas Pilipinas ug reigning PBA MVP nga si Junemar Fajardo makadawat og pasidungog gikan sa University of Cebu (UC) human sa iyang performance uban sa nasudnong koponan sa  2014 FIBA World Cup didto sa Seville, Spain.

Matud pa  ni UC team manager Atty. Baldomero C. Estenzo nga mohatag sila og special plaque of recognition ngadto sa ilang kanhi sentro tungod sa paghatag og dungog sa unibersidad ug ingon man pagserbisyo sa nasudnong koponan.

Gawas paghatag og award, si Estenzo miingon nga modalit usab sila og bangkete alang sa 6-foot-9 center.

  Pakyas pag-abante sa round of 16, apan ang ilang 81-79 nga kadaugan batok sa Senegal sa overtime, tataw na kaayong matawag og kalampusan tungod kay mao kadto ang unang daog sa Philippines sa FIBA sud sa 36 ka tuig. Katapusang  miabante ang Pilipinas niadtong 1978 didto sa Manila.

Bisan og daginuton  kaayo og playing time si Fajardo napakita gihapon niya ang iyang katakus ug mihimo siya’g dakung dungog dihang  ikaduha siya sa labing epektibong player sa 2014 FIBA World Cup sunod ni Pau Gasol sa  Spain atol sa elimination. Si Fajardo gigradohan sa Real GM og 44.92 efficiency rating, samtang si Gasol adunay 48.66.

Nalabwan ni Fajardo ang ubang NBA stars nga silang Goran Dragic sa Slovenia,  Anthony Davis sa USA ug Serge Ibaka sa Spain.

Gibansagan og ‘Kraken’, si Fajardo naapil sab sa top five total rebound percentage sa iyang 28.68%.  Nagpasabot kini nga kun  dunay sipyat nga tirada, may 28.68 porsiyento nga makuha ni Fajardo ang bola.

Si Estenzo, kinsa  mao usab ang legal adviser ni Fajardo ug sa umaabot nga PBA point guard Brian Quinton Heruela sa Blackwater  Sports  wala malipay sa gamay kaayong playing time ni Fajardo sa Gilas.

Matud pa ni Estenzo nga kon gihatagan pa lang unta ni coach Chot Reyes og igong playing time si Fajardo, wala pa unta’y segurong modaug ang Gilas batok sa Greece ug sa Puerto Rico. (BANAT NEWS)