CEBU, Philippines - Mipuwesto na sa ikaduha sa standing ang Universirty of the Visayas (UV) Baby Lancers human sa ilang kadaugan batok sa University of San Carlos (USC) Baby Warriors, 75-60 kagabii sa nagpadayong 14th Cebu Schools Athletic Foundation, Inc. (CESAFI) juniors’ basketball didto sa Cebu Coliseum.
Dominado sa Baby Lancers ang duwa apan didto na sila makahuygo sa second half human molabaw sa halftime, 34-28.
Naka-rally unta ang Baby Warriors apan kutob lang sa tres puntos ang labing duol nga ilang nahimo human sa basket ni Ralph Garret Bande, 26-29.
Misuway na sab unta'g lusad og mainitong rally ang Baby Warriors didto sa third period, apan ang hugot nga depensa sa Baby Lancers giduyogan sa ilang pagpangigo sa gawas, misutoy ang nauwahi ug miposte sa ilang labing dakung labaw nga 22 puntos, 71-49 pinaagi sa basket ni Orlan Wamar sa fourth period.
Si Raul Jancork Cabahug maoy nangu sa 6-1 nga Baby Lancers sa iyang 17 puntos, gisundan ni Theo Joshua Flores sa iyang 15 puntos. Sila si John Carl Escalona ug Wamar midugang og 12 ug 10 puntos matag usa.
Si Jean Jacque Antigua mao sab ang nangu sa 5-2 nga Baby Warriors sa iyang 13 puntos. Si Marc Andre Ting miamot og 11 puntos ug si Francis Edmar Galado miiskor og 10 puntos. (BANAT NEWS)