Baby panthers bangis pa sa Baby Jaguars

CEBU, Philippines - Mikawhat na sab og laing daog ang University of Southern Philippines Foundation (USPF) Baby Panthers sa ilang bugno batok sa University of San Jose-Recoletos (USJ-R) Baby Jaguars, 66-60 sa 14th Cebu Schools Athletic Foundation, Inc. (CESAFI) basketball event kagabii diha sa Cebu Coliseum.

Ning pagsuwat kagabii, padayon pang nagduwa ang University of the Visayas (UV) Green Lancers batok sa USJ-R Jaguars sa seniors division.

Mopahuway una ang CESAFI karong Sabado ug Domingo (Agosto 30 ug 31) ug mobalik ang duwa  sa Septiyembre 1 diin ang UV Lancers nagtinguha sa pagpanimalos sa ilang 74-83 nga kapildihan ngadto sa University of San Carlos (USC) Warriors.

Ang Baby Panthers maoy kanunay naglabaw sa maong sangka bisan og pirme sab mosikit ang Baby Jaguars.

Si Clyde Drexly Avancena maoy nangu sa 3-4 nga Baby Panthers sa iyang 22 puntos, samtang silang John Bryle Bahio ug Ain Obenza midugang og 16 ug 15 puntos matag usa.

Mihulga unta sa pagsikit ang Baby Jaguars, apan wala gyud sila makasugakod didto sa kinatumyan.

Lima lang ka players ang nakaiskor alang sa 1-5 nga Baby Jaguars nga gipangulohan ni  Raymund Lapinid nga miburak og 23 puntos, gisundan ni  Brian Divinagracia nga adunay 20 puntos.

Puntos matag usa

USPF (66) –  Avancena 22, Bahio 16, Obenza 15, Alocillo 6, Carbajosa 4, Archival 3.

USJ-R  (60) –  Lapinid 23, Divinagracia 20, Rubas 8, Belano 7, Gonato 2. (BANAT PALARO)