CEBU, Philippines- Mikulit og managlahing kadaugan ang Convergys 1 Wolves ug Lexmark Stallions sa 10th CSCC E-League basketball tournament niadtong Sabado diha sa City Sports Club-Cebu gym sa Cebu Business Park.
Ang Convergys 1 naglisud pag-iskor og daog batok sa 1&1 Marauders, 76-67, lahi sa Lexmark nga yano kaayong milansang og daog pinaagi sa paglubong sa Calltek Trojans, 69-37.
Walay magduduwa nakaiskor og double figures alang sa Convergys 1, apan ang ilang teamwork maoy ebidensiya pagpukan sa 1&1. Ang Convergys 1 wala na molingi human molabaw og 14 puntos sa halftime, 42-28.
Sa maong kadaugan, ang Convergys 1 nagsawo sa ikaduhang dapit uban sa defending champion Aegis Vipers sa managsamang 6-1 win-loss records.
Si Ian Isiah Gabest mikandos og 20 puntos, samtang si Jude Lorenz Camposo mihabwa’g 15 puntos, apan ang ilang mga paningkamot nausik lang kay ang 1&1 nahiagum sa ilang ikaupat nga kapildihan sa unom ka duwa.
Sa laing bahin, si Sylvester Millevo miugkat og 15 puntos ug si Ralph Lorenz Martinez miabuno’g 14 puntos alang sa Lexmark nga nagbitbit karon og 5-2 nga baraha. Si Mark Louisse Gelez mikadlit og 11 puntos aron pangulohan ang Calltek nga nakatilaw sa ilang ikalimang pilde batok sa duha ka daog.
Sa lain pang mga duwa, ang Sykes Pioneer walay puangod nga milubong sa Microsourcing Bullies, 88-41 alang sa ikaduha nilang daog sa pito ka duwa. Midaog sab ang Teleperformance Lions pinaagi sa default batok sa 24/7 Cagers.
Si Ricardo Masiglat Jr. ang nangu sa Sykes nga miiskor og 14 puntos, gisundan ni Rey Louie Leopardo nga adunay 12 puntos. Si Ray Oliver Castañares mihimo sab og double figures alang sa Sykes sa iyang 11 puntos. (BANAT NEWS)