UV gipakuratan sa CIT-U

CEBU, Philippines- Gipakuratan sa Cebu Institute of Technology-University (CIT-U) Wildcats ang defending champion University of the Visayas (UV) Green Lancers pinaagi sa pag-iskor og 67-60 nga kadaugan kagabii sa duwa ubos sa seniors division sa Cebu Schools Athletic Foundation, Inc. didto sa Cebu Coliseum.

Ning pagsuwat sa alas 7:30 sa gabii, padayon pang nagpinaksitay ang losing finalist sa miaging tuig ang Southwestern University (SWU) Cobras batok sa laing gi-ilang giant-killer ug upset-seeking ang University of San Carlos (USC) Warriors apan wala dayon hisayri ang opisyal ang resulta sa maong duwa.

Ang Wildcats ni ex-pro Gilbert Demape daan nang nakapanimaho og talagsaong kadaugan batok sa Lancers nga wala nila mahimo sukad sa miaging 13 ka tuig bisan pa man tuod og sila maoy unang team nga miabante sa CESAFI finals batok UV.

Niadtong mga panahona, lisod kaayong pildehon ang UV gani milanat og labing menos 60 ka sagunson nga duwa nga wala gyud sila makatialw og pilde hangtod nga naputol kini sa kadugayan batok sa University of Cebu (UC) Webmaster.

Tungod sa iyang pagsalig sa iyang fourth quarter unit, wala kini pulihi ni Demape ug ang iyang Wildcats nakahimo paglabaw og nuybe puntos, 64-55 sa kataposang 1:35 sa duwa nga naglakip kanilang Joshua dela Cerna, Franklyn Batiquin, Jose Marlo Pono, Jeffrey Taghoy ug Allan Dimco.

Kalit misikit ang UV human sa ilang five-point swing, 60-64 sa nahibiling 1:20 sa duwa apan ang duha ka free throws ni Dela Cerna ug split charities ni Batiquin maoy nagselyado sa ilang kadaugan sa final score nga 67-60.

Si Dela Cerna maoy nangu sa Wildcats sa iyang 25 puntos samtang midugang og 22 puntos si Dimco.

Wala'y players sa Lancers nga nakahimo'g double figures tungod kay igo lang mi-iskor og nuybe puntos matag usa silang John Michael ug Alfred Codilla.

Sa sayo pa, gikulata sa University of San Carlos (USC) Baby Warriors ang  Don Bosco Technology Center (DBTC) Greywolves pinaagi sa pag-iksor og 82-29 nga kadaugan samtang gilubong sab sa Baby Lancers ang CIT-U Wildkittens, 72-59.

Si John Carl Escalona maoy nangu sa UV sa iyang 21 puntos ug may 20 puntos si Justin Jules Langres aron pangulohan ang Wildkittens.

Sa laing bahin, ang Baby Warriors gipangulohan ni Joseph Echeverri kinsa mibahug og 20 puntos samtang miposa og 10 puntos si Mark Anthony John Agustinez alang sa Greywloves. (BANAT NEWS)