14TH CESAFI ilusad sa Hulyo 30
CEBU, Philippines - Ang 2014 season sa Cebu Schools Athletic Foundation Inc. (CESAFI) gitakdang ilusad karong Hulyo 30 sa alas-2 sa hapon diha sa Parklane Hotel.
Adunay unom ka teams ang mopakita’g aksiyon sa collegiate division, samtang siyam sa secondary.
Ang University of the Visayas (UV) Green Lancers maoy defending champion sa collegiate division, samtang walay champion sa secondary sa miaging tuig tungod sa kontrobersiya nga mitumaw human mopasaka og temporary restraining order ang korte nga gisang-at sa mga ginikanan ni USC Baby Warriors player Scott Aying nga mikwestiyon sa ilang eligibility sa CESAFI.
Busa, ang Sacred Heart School-Ateneo de Cebu (AdC) Magis Eagles lang gihapon maoy giilang champion.
Matud pa sa ilang Athletic Director nga si Rico Navarro, daku siya’g paglaum nga mosulod gihapon sa top four ang kasamtangan nga line-up sa Magis Eagles bisan og wala na kanila silang Arnie Padilla, Argee Araw-Araw, Rendell Senining, Jair Igna ug ang iyang anak nga si Jose Maria ‘Popoy’ Navarro.
Si Aying dili na moduwa sa CESAFI tungod kay mibalhin siya sa Chian Kai Shek High School uban ni John Galinato.
Dili sab mo-coach si Britt Carlo Reroma tungod kay tua siya karon mag-coach sa Indonesia.
Posibleng moabante sa semifinals karong tuiga sa juniors division ang SHS-AdC Magis Eagles, USC Baby Warriors, UV Baby Lancers ug ang UC Junior Webmasters. (BANAT NEWS)
- Latest
