Eperformax pabiling way pilde sa E-League
CEBU, Philippines - Walay hunong nga mihakot og daog ang ePerformax Reds aron magpabiling walay pilde sa nagpadayong aksiyon sa 10th CSCC E-League basketball tournament.
Ang ePerformax mitamparos sa Wipro Tigers, 67-57 niadtong Domingo diha sa City Sports Club-Cebu gym sa Cebu Business Park.
Gipangulohan kini ni Joey Mari de Guzman, kinsa mikimada og 24 puntos, lakip na ang iyang 12 puntos sa final period.
Ang ePerformax milabaw lang og singko puntos human sa tulo ka kuwarter, 43-38, apan si de Guzman miariya og 12 puntos inubanan og duha ka sunod-sunod nga triples aron dili na makabangon ang Wipro sa hinapos nga bahin sa fourth quarter.
Si Angellan Visoc mitampo’g 13 puntos, milangkat og lima ka rebounds alang sa ePerformax nga miinat sa ilang nagkadinang daog ngadto sa lima ka duwa.
Nanginit sab si John Paul Escudero sa final quarter diin mipabuto siya’g 12 sa iyang 18 puntos, tanan gikan sa 3-point arc, apan ang iyang mga paningkamot nausik lang kay wala kini makapadaog sa Wipro.
- Latest
