Labordo UG Ocon ‘Harung sa Bohol’

CEBU, Philippines - Sukdon na sab ang abilidad ni ALA Boxing Gym prospect Juren ‘Turbo’ Labordo (12-1, 8KOs)  nga maoy bida sa ALA-Cobra Energy Drink “Tunay na Lakas Boxing” fight card karong gabii didto sa Island City Mall sa Tagbilaran, Bohol.

Si Labordo, kinsa gitan-aw isip sumusulbong  nga regional title contender gikan sa ALA Gym makigbatok ni Fernando ‘Batang Bato’ Ocon (12-7, 4KOs).

Lab-as pa sa iyang first round knockout nga kadaugan batok ni JP Macadumpis niadtong Mayo 31 diha sa Mandaue City, si Labordo maningkamot nga makahimo og laing impresibong  daog.

Sa supporting main event, ang stablemate ni Labordo nga si Jimmy ‘Popeye’ Paypa (15-2, 5KOs)  mosukod sab sa abilidad ni  journeyman  Gadwin Tubigon (10-9-2, 5KOs) sa laing 10-rounder bout.

Si Paypa nga adunay 13-fight winning streak makigharong sa mas labaw sa kasinatian nga si Tubigon, kinsa miaway  niadto alang sa WBF International  super  featherweight belt.

Moaway usab sa maong boxing card mao ang walay pilde nga si Mark ‘Magnifico’ Magsayo (6-0, 4KOs). Manalipod siya sa iyang limpiyong rekord batok ni  Ernesto Fontanilla (11-5, 5KOs).

Mokompleto sa fight card mao ang sangka nila ni Peter Apolinar batok Jamjam Ungon, Vic Casido batok Albert Muring, James Paul Talaman batok Jovane Abejero ug Ryan Canillas batok Rafael Sueno.