CEBU, Philippines - Magsagubang og laing bug-at nga hagit si unbeaten featherweight Dodie Boy 'Dugong Kampeon' Peñalosa Jr. (12-0, 11KOs) sa iyang sangka batok sa bisitang boksidor nga si Yon Armed (11-5, 6KOs) sa Indonesia karong Hulyo 26 didto sa Mandaluyong Gym.
Ang 23-anyos nga si Peñalosa, anak ni kanhi two division world champion Dodie Sr., katapusang midaog niadtong Disyembre 13 dihang iyang gipaundang sa ikapitong round si Alem Robles didto sa Solaire Resort Hotel and Casino.
Human sa unom ka buwan nga pahuway, si Peñalosa nga usa sab ka college student sa University of the Visayas (UV), manalipod sa iyang walay buling nga rekord. Damgo sab ni Peñalosa nga makaaway og world title.
Moaway sab sa maong boxing card ang iyang maguwang nga si Dave 'Hunter' Peñalosa (8-0, 5KOs) batok ni Danilo Gabisay (5-3, 2KOs) sa Bulacan sa usa ka eight-rounder bout.
Atngan sab ang comeback fight ni kanhi world title challenger Bernabe 'Abe' Concepcion (32-6, 18KOs) batok ni veteran Eden Sonsona (32-6, 10KOs). (BANAT NEWS)