CEBU, Philippines - Anaa gihapon ang dakung paglaum ni Filipino Hall of Famer Efren 'Bata' Reyes nga mokampiyon human niya malikayi ang pagkataktak dihang midaog siya sa loser's bracket batok ni Denis Grabe sa Estonia sa WPA World 9-ball Championship kagahapon didto sa Al Saad Sports Club sa Doha, Qatar.
Nabutang sa delikado ang sitwasyon ni Reyes human siya mapilde ni Jeong Young Hwa sa South Korea, 9-5 sa opening match.
Apan kagahapon, gipagawas ni Reyes ang tanan niyang abilidad sa billiards aron pildihon si Grabe, 9-8 aron pabiling buhi alang sa iyang tinguha pagbulsa sa $30,000 (P1.3 million) grand prize sa maong torneyo.
Uban ni Reyes nga moabante sa sunod round mao ang mga Pinoy pool masters nga sila si Lee Van Corteza sa Cagayan de Oro City, Ramil Gallego sa Bacolod City ug Francisco Felicilda.
Ang world ranked No. 4 nga si Corteza mipukan ni Mario Morra sa Canada, 9-6, samtang sila si Gallego ug Felicilda, mipilde nila ni Mishel Turkey sa Qatar, 9-7, ug Christian Aguirre sa Ecuador, 9-5.
Laing mga Pinoy nga una nang miabante sa second round mao sila si Elmer Haya, Jeffrey de Luna, Johann Chua ug Cebuano Israel Rota.
Midaog usab sa tagsa-tagsa nila ka mga opening match sila si Antonio 'Gaga' Gabica, Dennis Orcollo, Carlos Biado ug Cebuano cue master nga si Warren Kiamco. (BANAT PALARO)