CEBU, Philippines - Gisarapan sa Accenture Sharks ang defending champion Aegis Vipers aron moiskor og daog, 69-45 sa 10th CSCC E-League basketball tournament niadtong Sabado didto sa City Sports Club-Cebu gym sa Cebu Business Park.
Wala moila og kampiyon ang Accenture ug ila dayon gilubong ang Aegis, 23-3 paghuman sa first quarter.
Ang Accenture padayong miataki ngadto sa Aegis sa ikaduhang kuwarter aron moposte'g 32 puntos nga labaw sa halftime, 46-14 ug wala na kini molingi pa sukad niadto.
Si Ryan Edward Llanos maoy nangulo sa balanseng ataki sa Accenture pinaagi sa iyang 19 puntos, duha ka rebounds, duha ka steals ug duha sab ka assists.
Si Archie Brian Vincent Batua mipabuto'g 13 puntos, samtang si Ryan Jay Peñaranda miabuno'g 10 puntos alang sa Accenture.
Bugtong si Kevin Clark Navaja lang ang miiskor og double digit alang sa Aegis pinaagi sa iyang 11 puntos. (BANAT NEWS)