2014 Cesafi Season buksan sa Agosto 2

CEBU, Philippines - Eksplosibong aksiyon ang masaksihan sa  mga local basketball fans atol sa pagbukas sa  2014  Cebu Schools Athletic Foundation Inc. (CESAFI) unya sa Agosto 2 diha sa Cebu Coliseum.

 Ang University of the Visayas (UV) Green Lancers mosugod sa ilang kampanya sa pagsakmit sa ilang ika-11 nga titulo.

 Nakuha sa Lancers ang ika-10 nga korona sa miaging tuig ubos ni coach Felix 'Donbel' Belano, kinsa mihimo'g rekord human makabangon ug midaog gikan sa 0-2 sa best-of-three finals batok sa Southwestern University (SWU) Cobras.

 Ang siyam ka sagunson nga daog sa UV Lancers nahimo ubos ni kanhi coach Elmer 'Boy' Cabahug.

 Matud pa ni CESAFI commissioner Felix 'Boy' O. Tiukinhoy nga adunay siyam ka teams sa high school ug pito sa collegiate ang mosalmot, apan posibleng unom lang sila karong tuiga tungod kay wala pay kompirmasyon gikan sa University of Southern Philippines Foundation (USPF) Panthers  nga temporaryong gi-disband.

 Sa higayon nga dili  mosalmot ang USPF, si Tiukinhoy miingon nga  ila  gihapon padayonon ang torneyo  bisa'g  unom lang ka teams ug mosubay kini  sa  double round robin series.

 Walay defending champion alang sa high school division  tungod kay   wala matapos ang torneyo gumikan sa  pagluwat sa korte og temporary restraining order (TRO) batok sa liga.  Kini kalabot sa kaso nga giduso sa ginikanan ni USC player Scott Aying batok sa CESAFI.

 Tungod kay wala pa gihapoy desisyon gikan sa korte, dili   gihapon makaduwa si Aying, sumala pa ni Tiukinhoy.