CEBU, Philippines - Mikulit dayon og daog ang mga lig-ong teams pagbukas sa CYBL VisMin Goodwill Games nga gipaluyohan sa Alaska didto sa Lux Oriens Gym sa Sacred Heart School-Ateneo de Cebu (SHS-AdC) Canduman Campus.
Gisugdan kini sa kadaugan sa team ubos sa Under 12 division dihang gilatos dayon sa defending champion USC Green ang bisita gikan sa Ormoc, 60-20. Ang Cebu Eastern College (CEC) milubong sa Don Bosco Technology Center (DBTC), 58-39 samtang ang Ateneo de Iloilo midemolis sa Ormoc, 70-25.
Midaog sab ang University of the Visayas (UV) batok sa SHS-AdC, 44-43. Ang SHS-AdC nakaipsot batok sa Xavier University (XU) sa Cagayan de Oro, 47-41, apan daling nakarekober ang Xavier dihang ilang gipukan ang USC Gold, 59-34.
Sa mga duwa ubos sa Under 15 division, midaug ang USC batok sa CEC, 62-52 ug ila sab gipilde ang USPF 1, 55-34 alang sa 2-0 record. (BANAT PALARO)