James nagmangtas

CEBU, Philippines -  Nagmangtas na  sab  si  LeBron James diin miiskor siya'g 49 puntos aron agakon ang Miami Heat ngadto sa 102-96 nga kadaugan batok sa host Brooklyn Nets sa Game-4   kagahapon didto sa Barclay Center sa  New York.

 Ang defending champion  nga Heat nga adunay 3-1 nga bentaha, nagkinahanglan  na lang og usa ka daog aron mobalik sa Eastern Conference Finals.

 Natupngan ni  James ang iyang playoff career-high nga 49 puntos nga una niyang nahimo dihang nagduwa pa siya sa Cleveland.

 Usa ka sipyat sa free throw maoy nagpugong kang James nga mokulit og kasaysayan sa iyang  karera tungod kay moabot unta ang iyang iskor og 50 puntos.

 "That's the first time I've been disappointed in myself in a win," matud pa ni James human sa duwa.

 Suwayan sa Heat ang pagtapos sa series dihang sila ang mo-host sa Game-5 ugma didto sa American Airlines Arena.

 Sikit kaayo ang duwa gikan sa sinungdanan ug ang three-pointer ni Chris Bosh sa nahibiling 57 segundos maoy nahimong yawi sa ilang kadaugan.

 Si James adunay 16-of-24 gikan sa field ug may 14-of-19 gikan sa free throw line hinungdan nga miabot ang iyang iskor og 49 puntos nga una niyang nahimo niadtong 2009 Eastern Conference finals diin ilang gipilde ang Orlando Magic.

 Ang itsa ni Chris Bosh   maoy misiak sa 94-94 nga panagtabla sa final period ug giinat sa Heat ang ilang bentaha pinaagi sa upat ka free throws ni Ray Allen.

 Si Dwyane Wade miamot og 15 puntos alang sa Heat, si Bosh mitampo'g 12 puntos, samtang si Allen miabuno'g 11 puntos.

 Gipangulohan sab ni Joe Johnson ang Nets nga mikawhat og 18 puntos. Si Johnson igo lang mihimo'g 5-of-22 gikan sa 3-point range nga layo kaayo itandi sa nahimo niya sa Game-3 nga 15-of-25.

 Miiskor sab og double figures si Paul Pierce pinaagi sa iyang 16 puntos, sila si Deron Williams ug Shaun Livingston miamot og 13 puntos matag usa.

 Ang modaog sa maong series moharong sa Eastern Conference top seeds Indiana Pacers o Washington Wizards sa conference finals.

 Ang Pacers kasamtangang nag-una sa series, 3-1.

 Sa laing aksiyon, nakaginhawa pa ang Portland TrailBlazers human nila gilubong ang San Antonio Spurs, 103-92 sa Game-4 sa Western Conference.

 Si Damian Lillard miiskor og 25 puntos  aron  mapakgang ang tinguha sa Spurs nga mohimo'g 4-0 sweep. Si Nicolas Batum mitampo'g  14 puntos  uban ang 14 ka rebounds ug walo ka assists.  Napugngan si Tony Parker ngadto lang sa 14 puntos nga mas ubos kaayo sa iyang average nga labing menos 29 puntos sa miaging tulo ka duwa. (BANAT NEWS)