CEBU, Philippines - Pasay City – Ang ALA light welterweight fighter nga si Jason 'El Nino' Pagara mohimo na usab og laing lakang sa iyang damgo nga moaway og world title dihang siya ang mobida sa "Pinoy Pride XXVI" sa Hunyo 21 diha sa Waterfront Cebu City Hotel and Casino.
Si Pagara (32-2, 19KOs), modepensa sa iyang WBO International light welterweight title batok sa Mehikanong boksidor nga unya pa nganlan.
"Jason is working hard in a training camp right now for a fight next month. We can't confirm yet the name of his Mexican opponent but I can say that this will be a big and significant outing for him," matud pa ni ALA Promotions President and CEO Michael Aldeguer.
Ang 25-anyos nga si Pagara lab-as pa sa iyang seventh round TKO sa Indonesian nga si Rusmin Rie Raha niadtong Abril 11 didto sa iyang hometown sa Maasin City, Southern Leyte.
Sa labing unang higayon sa kasaysayan sa Pinoy Pride series, duha ka managsuon ang mangulo sa usa ka fight card dihang ang manghod ni Jason nga si 'Prince' Albert Pagara (19-0, 13KOs) moaway sa supporting main event. Si Albert bag-o pa gikan sa iyang third round demolisyon ni Indonesian Skak Max niadtong Abril 11 didto gihapon sa Maasin.
Ilakip usab sa maong fight card ang kanhi world title challenger nga si AJ 'Bazooka' Banal (30-2, 21KOs), kinsa mosuway pagbangon sa iyang karera isip usa sa mga elite boxers nasud. (BANAT NEWS)