Yamyamin hari sa April edition sa CEPCA monthly tourney

CEBU, Philippines -  Nakatabla si Rosendo Yamyamin  uban ni chess tutor Peterson Sia sa final round ug igo na kaayo alang kaniya aron modaog sa April edition sa  Cebu Executives and Professionals Chess Association (CEPCA) monthly tournament niadtong Domingo didto sa Handuraw Café sa Gorordo Avenue, ning siyudad.

 Sa wala  pa sila mag-abot ni Sia,   gihawan una ni Yamyamin ang iyang dalan paingon sa final pinaagi sa pagpilde nilang Jun Kidlat, Amado Olea, Carlo Maraat ug Reynaldo Flores aron tapuson ang 5-round Swiss system competition bitbit ang 4.5 puntos.

 Gawas sa pagbulsa'g P1,500 nga ganting salapi, si Yamyamin nakakuha sab og pasaporte alang sa "Battle of  Champions" karong Disyembre uban sa early qualifiers nga silang Jimmy Ty Jr.,  Mario Mangubat ug  Tony Cabibil.

 Si Maraat nalandig sa ikaduhang dapit, samtang ang mosunod nga tulo ka puwesto nakuha nilang Sia, laywer Jong Melendez ug Flores. Si Maraat  mibulsa'g P1,000, samtang si Sia nakadawat og P500.

 Ang mga premyo gidonar ni kanhi CEPCA President Rolando 'Jojo' Muralla. (BANAT PALARO)