Asturias basketball showdown sa Abril 12

CEBU, Philippines -  Sa tuyo nga  mamahimong  solidong koponan, ang Poblacion All Stars nga maoy kampiyon sa 2013 Asturias Basketball Tournament nakighugpong sa GN Bakeshoppe Asturias aron takus kining makigsangka batok sa  collegiate team sa Sugbu  ang University of San Carlos (USC) Warriors sa ipahigayong Asturias Basketball Showdown sa Abril 12 didto sa Asturias covered court.

 Ang hiniusang puwersa sa Poblacion All Stars ug GN Bakeshoppe pagatimonan ni coach Severino 'Beling' Baricuatro.

 Sa dili pa magsangka ang    USC Warriors ug GN Bakeshoppe-Asturias All Stars sa alas-9:30 sa gabii, magtigi una ang EJ Bread Buddy ug GN Bakeshoppe Langub  sa alas-7:30 sa gabii.

 Ang usa ka adlaw nga showdown gipasiugdahan sa Knicks of  Columbus Asturias Council 7396 ug sa pagdumala nilang Dr. Conrado V. Vitug,  Grand Knight Bro. Augustus D. Kiamco, Deputy Grand Knight Armand Tabada ug Eddie Montebon.

 Gipaluyohan sab kini sa Poblacion Barangay Council ubos sa liderato ni Brgy. Capt.  Carmela Dumdum, councilors Josias A. Peñalosa ug Aristeddes T. Aguanta ug sa tibuok konseho.

 Ang kalihukan usa ka fund-raising activity sa Knight of Columbus alang sa kapuslanan sa summer livelihood training program ug sa out-of-school youth.

 Mapalit ang mga tiket sa kantidad nga P20 aduna na kini lingkoranan ug P10 sa general admission.