USC Green, DBTC-B midaog korona sa Alaska Caging

CEBU, Philippines - Nakabitbit og titulo ang University of San Carlos (USC) Green ug ang Don Bosco Technology Center (DBTC) dihang sila maoy midaog sa tagsa-tagsa ka dibisyon sa Alaska Basketball Cup Cebu  niadtong Huwebes didto sa USC North gym.

Ang USC Green mipukan sa  ilang igsuong koponan USC Gold,  44-34 aron sakmiton ang Under-10 title.

Si Justin Ian Betinol maoy nangu sa USC Green sa iyang 26 puntos diin 10 niini  gikan sa fourth period.  Si Sid Reroma miamot og 11 puntos. Ang napildeng USC Gold gipangulohan ni Tyke Abella sa iyang nuybe puntos.

Sa laing final match,  ang   DBTC-B  mipilde sab sa University of the  Visayas (UV)-B,  64-60 aron langkaton ang Under 16 division 2 title.

Ang DBTC-B maoy  mikontrolar sa duwa ug miabante kini sa iskor nga 46-38  paingon sa final period, apan ang UV-B mi-rally aron tablahon ang iskor, 54-all.

Nagsinukliay og mga puntos ang duha ka kampo hangtod nga si Angelo Del Campo miarte  aron  maoy  moselyo  sa kadaugan.

Si Del Campo maoy topscorer sa DBTC-B sa iyang 19 puntos, samtang si Arljun Minerva  sa UV-B sa iyang 12 puntos