CEBU, Philippines - Ang Cebuana running sensation nga si Mary Joy Tabal maoy migawas nga mananaug sa women’s class sa 10k division sa 2014 Summer Run kagahapon didto sa Paseo Arcenas sa Banawa.
Si Tabal kinsa morepresentar sa nasud sa Paris Marathon karong Abril 6, padayon sa iyang preparasyon ug ang pagsalmut sa Summer Run usa sa giisip niyang tune-up run sa dili pa ang Paris marathon.
Ang National Milo Marathon queen mitapos sa lumba sud ra sa 38 minutos, gisundan sa managsuong Andrin nga sila si Lovely ug Cherry kinsa mirehistro og oras nga 44:28 ug 44:29.
Sama sa gilauman, ang mga Kenyan runners ang miharus sa men’s 10K run. Si Isaac Simat maoy kampiyon sa oras nga 33:00, samtang sila si Abraham Missoss (33:13) ug Douglas Mwiti (33:35) maoy second ug third placers.
Sa 5K class, si Jhean Andri midaog sa oras nga 20:55. Si Sarah Lee Quizon maoy second placer sa oras nga 21:15 ug si Lynle Cardenas mipwesto sa ikatulo sa oras nga 21:28.
Ang top three sa men’s 5K mao sila si Robert Daang (16:41), John Daryl Manos (16:45) ug Ivan Santos (17:25). Migawas nga mananaug sa 3K sila si John Cliff Debulusan ug Mary Loy Loberanes. (BANAT NEWS)