CEBU, Philippines - Giharos sa University of the Visayas (UV) 2014 Talisay City Beach Volleyball Invitational Competition diin milangkat kini og duha ka titulo sa ilang tagsa-tagsa ka dibisyon kagahapon didto sa landing site sa Brgy. Poblacion, dakbayan sa Talisay.
Ang UV nga gibitoonan nilang Jusabelle Brillo ug Apple Saraum misakmit sa women's title pinaagi sa pagpilde sa University of Southern Philippines Foundation (USPF) nilang Rochelle Rica ug Gelly Murpos.
Ang tandem nilang Brillo ug Saraum midaog sud sa straight sets, 21-16, 21-14.
Sa laing bahin, ang University of San Jose-Recoletos (USJ-R) mipahiluna sa ikatulo human sila modaog sa tulo ka sets batok sa Southwestern University (SWU), 15-21, 21-17, 15-10.
Sa men's division, ang UV nilang Jade Becaldo ug Loujie Tigpos mipukan sa SWU nilang Relan Taneo ug Rommel Pepito.
Midaog ang UV sud lang sa duha ka sets, 21-18, 21-15.
Ang USPF nilang Edmar Bonono ug John Tormis miangkon sa ikatulong dapit pinaagi sa pag-iskor og 3-0 batok sa USJ-R.
Ang torneyo usa sa mga highlights sa Takas sa Talisay Kagawasan Sugbo Celebration. (BANAT NEWS)