CEBU, Philippines - Mipakanaog na usab og silot ang Cebu Football Association (CFA), ning higayona batok sa tulo ka spectators nga miapil sa karambola atol sa duwa sa Sacred Heart School-Ateneo de Cebu (SHS-AdC) ug Alcoy FC sa under-18 division sa 16th Aboitiz Cup niadtong Marso 16 didto sa Aboitiz Sports Field sa Brgy. Subangdaku, Mandaue City.
Ang tulo ka mga tumatan-aw nga gisagpa og one-year ban sa CFA mao sila si Enrico Mongaya, Paul Chris Costin ug Ricardo Pepito.
Si Mongaya maoy labing nailhan sa tulo nga gisilotan tungod kay siya ang nakuhaan og hulagway nga nanapat sa goalie sa Alcoy FC.
"Enrico Mongaya, Paul Chris Costin and Ricardo 'JR' Pepito, are banned from entering within a one hundred meters from the fence of the tournament venue of any and all CFA sanctioned tournaments for a period of one year from the receipt of this decision," segun pa sa statement sa CFA.
Ang CFA una nang mipahamtang og silot ngadto sa mga players nga apil sa lamok-lamok apil na ang coach sa duha ka koponan.
Basi sa mga hulagway ug mga pamahayag sa mga saksi, nagsugod ang partisipasyon ni Mongaya dihang gidumog sa goal keeper sa Alcoy FC nga si Rodnel Benolirao si JM Kwan sa Ateneo.
Dihang gituok ni Benolirao si Kwan, didto na misud sa eksena si Mongaya nga mihapak sa goalie, kinsa nakahiagum og head injury.
Bisan pa'g intensyon ni Mongaya ang pagluwas ni Kwan, desidido gihapon ang CFA nga mosilot ni Mongaya tungod sa matang sa aksyon nga gibuhat niini.
Sila si Costin ug Pepito, naapil pagsilot sa CFA tungod kay misulod sila sa playing field ug miapil sa lamok-lamok sa mga players.
"Paul Chris Costin and Ricardo Pepito must realize that violent behaviors have no place in the beautiful game of football. Football rejects the use of violence of any game by anyone involved in the game," dugang pa sa CFA officials.
Sa laing bahin, ang CFA wala pa kadawat og imbitasyon gikan sa Cebu Provincial government nga gusto og reconciliation talks tali sa duha ka partido.
"We haven't received any invitation or communication from them (Cebu Provincial government) about this matter. We do welcome it. We want that ang tanan magkasinabot na," matud pa ni CFA vice president Rico Navarro. (BANAT NEWS)