Gipatay sa tres
CEBU, Philippines - Mipatuasik og tulo ka sunod-sunod nga three- point shots ang Oklahoma City Thunder sa nahabiling 49 segundos sa second overtime nga kabahin sa ilang 9-0 rally ug ang go-ahead 3-pointer ni Kevin Durant maoy mipatay sa host Toronto Raptors, 119-118 sa ilang duwa sa NBA kagahapon didto sa Air Canada Center.
Nabiyaan og otso puntos ang Thunder, 110-118 sa katapusang 49.3 segundos human sa duha ka free throws ni Kyle Lowry, apan gihinay-hinay kini'g kitkit sa Thunder.
Lain na sab nga high-scoring night ang gihimo ni Durant, kinsa mihagdaw og 51 puntos uban sa 12 ka rebounds. Wala makatiwas og duwa ang All-Star guard nga si Russell Westbrook sa third quarter tungod sa napiang nga tuong tuhod, apan makasustenir lang gihapon ang Thunder.
Si Reggie Jackson midugang og 25 puntos, samtang si Serge Ibaka adunay 13 puntos alang sa Thunder nga aduna nay 12-2 record sa ilang road game batok sa mga karibal gikan sa Eastern Conference.
Si Durant maoy mihatag og labaw sa Thunder pinaagi sa iyang three-pointer sa nahabiling 1.7 segundos sa second overtime.
Mao kadto ang ikaupat nga sagunsong daog sa Thunder ug aduna na sila'y 3-0 nga baraha sa ilang road trip nga naglakip og kadaugan didto sa Chicago ug Cleveland.
Si DeMar DeRozan maoy nangu sa Raptors pinaagi sa iyang 33 puntos, gisundan nilang Amir Johnson ug Lowry nga adunay 25 puntos matag usa, si Greivis Vasquez miamot og 21 puntos sa wala pa ma-fouled out sa daginutong oras sa duwa.
Sa lain pang mga duwa, gilubong sa Indiana Pacers ang Chicago Bulls, 91-79, ang Miami Heat mipakaging sa Memphis Grizzlies, 91-86, gipilde sa New York Knicks ang Philadelphia Sixers, 93-92.
Ang New Orleans Pelicans mibihag sa Atlanta Hawks, 111-105, ang Brooklyn Nets milubong sa Boston Celtics, 114-98, gipilde sab sa Dallas Mavericks ang Denver Nuggets, 122-106, midaog ang Phoenix Suns batok sa Detroit Pistons, 98-92, ang San Antonio Spurs nimasaker sa Sacramento Kings, 99-79 ug ang Washington Wizards midaog sa Los Angeles Lakers, 117-107. (BANAT NEWS)
- Latest
