CEBU, Philippines - Gidominar ni South African Daniel Hugo ug Swiss national Renata Bucher ang premier division sa Vaseline Men Xterra Philippines triathlon race kagahapon didto sa Seafront Resort sa Liloan, Cebu.
Gitapos ni Hugo ang makaluya nga lumba sud sa duha ka oras, 48 minutos ug 48 segundos nga nakabaraw sa gipangandoy nga "grandslam" ni "back-to-back" champion Ben Allen sa Australia.
Si Allen nalagpot sa ikatulong dapit sa oras nga 3:21:52, sunod sa laing South African nga si Bradley Weiss (2:56:39).
Sa iyang bahin, tam-is usab ang kadaugan ni Bucher dihang nakuha niya pagbalik ang korona sa women's division human siya napilde ni Lesley Paterson sa miaging tuig. Si Paterson wala misalmot sa lumba.
Dili hinuon sayon ang giagian ni Bucher kay dili kaayo daku'g biya ang nagsunod kaniya nga si Carina Wasley. Si Bucher mi-oras og 3:24:59, samtang si Wasley adunay oras nga 3:25:18. Mipahiluna sa ikatulong dapit si Mieko Carey sa oras nga 3:27:34.
Ang Cebu-based triathlete nga si Joseph Miller maoy midaog sa Filipino elite division, gisundan nila ni Franklin Peñalosa ug Jefferson Tabacon isip runner-ups.
Sila si Joyette Jopson, Noemi Andrea Galeos ug Cianyl Jamae Gonzales maoy top three finishers sa women’s division sa Filipino elite class.
Mokompleto sa age-group winners mao sila si Jose Lim (30-34), Mervin Rencel Santiago (18-24), Brian Borling (25-29), Christopher Eyao (35-39), Noel Salvador (40-44), Glenn Gonzalez (45-49), John Sadler (50-54), Hugo Jones (55-59), Angelica Yvonne Limjoco (25-29), Ylang-Ylang Jordan (30-34), Maria Margarita Hizon (35-39) ug Erica Dueger (50-54). (BANAT NEWS)