CEBU, Philippines - Nag-unang duha ka teams sa Western Conference nga San Antonio Spurs ug Oklahoma City Thunder parehong miiskor og daog batok sa tagsa-tagsa nilang kaatbang sa nagpadayong duwa sa NBA kagahapon sa managlahing binyu.
Ang Spurs mitipi sa Chicago Bulls, 104-96 didto sa United Center sa Chicago, Illinois ug ang Thunder mipahagsa sa Houston Rockets, 106-98 didto sa Chesapeake Energy Arena sa Oklahoma.
Nagwala og maayo si Kevin Durant diin mipadahunog kini og 42 puntos aron pangulohan ang Thunder, samtang si Rusell Westbrook midugang og 24 puntos.
Si Westbrook midominar og maayo batok ni Patrick Beverley, kinsa igo lang mihimo'g dos puntos ug may lima ka fouls sud sa 25 minutos.
Diriyot na sab magkainitay silang Westbrook ug Beverley sa tunga-tungang bahin sa first period human gitapik ni Beverley ang bola gikan sa kamot ni Westbrook.
Si James Harden nga maoy mitimon sa Rockets nga miburak og 28 puntos.
Sa laing bahin, ang beteranong guwardiya nga si Manu Ginobili mipabuto'g 22 puntos ug si Tony Parker adunay 20 puntos aron pangulohan ang league-leading San Antonio nga miposte og 38-14 sa first quarter. Mitubo pa ang labaw ngadto sa 18 puntos sa halftime, 61-33 aron mokulit sa ilang ika-26 nga daug sa road games.
Si Kawhi Leonard mitampo'g 16 puntos alang sa Spurs, kinsa adunay 47-16 nga baraha ug mao na karon ang overall leader.
Sa laing duwa, nabalikan na sab sa kalagsik ang Indiana Pacers, kinsa mikulit og 94-83 nga kadaugan batok sa Boston Celtics atol sa debut game ni Andrew Bynum. Midaug ang Detroit Pistons batok sa Sacramento Kings, 99-89, ang Minnesota Timberwolves mitumba sa Milwaukee Bucks, 112-101, gibihag sa Memphis Grizzlies ang Portland TrailBlazers, 109-99 ug ang Golden State Warriors milubong sa Dallas Mavericks, 108-85. (BANAT NEWS)