LW-IBI milangkat korona sa 35-above FCA cagefest
CEBU, Philippines - Nakadaog gyud ang Living Word-International Bible Institute (LW-IBI) bisan nagkamang sila sa pagsugod batok sa House of Home (HOH) Slingers, 77-61 aron usab masakmit ang 35-above title sa 1st Fellowship of Christian Athletes (FCA) basketball tournament didto sa Sacred Heart School-Ateneo de Cebu gym sa General Maxilom Avenue, ning siyudad.
Mipabuto'g 29 puntos si Mario Suarez, samtang sila si Jonathan Sacabon ug Edwin Catamco nagkumboya'g 23 puntos alang sa LW-IBI ni Pastor Mel Capparos.
Ang LW-IBI nabiyaan og tulo ka puntos sa unang kuwarter, 9-12, apan milusad sila'g 19-6 run sa second period aron motanom og double-digit nga labaw sa halftime, 28-18.
Nakontrolar nila ang duwa sa nahabiling duha ka kuwarter aron maangkon ang 16 puntos nga daog.
Sa duwa alang sa ikatulong dapit, ang Christian Workers Basketball Association (CWBA) mibuntog sa Living World-South sa iskor nga77-70.
Si Ronald Canoy maoy nangulo sa CWBA nga mitikdol og 22 puntos, samtang sila si Alvin Abestilla ug Rudyard Mamac miambit og 12 puntos matag usa.
Gipangulohan sab ni Allan Pelino ang LW-South nga miugkat og 14 puntos, gisundan ni Jojo Pastor nga miugbok og 13 puntos ug July Navarette nga misapsap og 11 puntos. (BANAT NEWS)
- Latest
