CEBU, Philippines - Kasado na ang tanan alang sa pagpahigayon sa Cebu Inter-Collegiate Basketball Tournament nga sugdan karong Marso 21-23 diha sa Cebu Coliseum.
Mosalmot sa tulo ka adlaw nga torneyo mao ang 2013 CESAFI champion University of the Visayas (UV) Green Lancers, University of San Jose Recoletos (USJ-R) Jaguars ug University of San Carlos (USC) Warriors ug ang 2013 NCAA champion team San Beda (SB) Red Lions ni coach Boyet Fernandez.
Matud pa ni Cebu City Sports Commission (CCSC) commissioner Michael Sy, kansang buhatan usa sa nagpaluyo sa maong torneyo, nga dinhi makita kun kinsa ang mga bag-ong players nga makatabang sa kampanya sa ilang tagsa-tagsa ka tunghaan o unibersidad sa umaabot 2014 CESAFI season nga gikatakdang sugdan sa Hulyo.
Giawhag sab ni Sy ang mga alumni sa San Beda sa pagsuporta sa ilang team ug usa kanila mao si Cebu City Mayor Mike Rama, kinsa didto magtungha og "Law" sa maong tunghaan.
Ang team nga adunay labing daghang daog maoy isipon nga champion.
Sa laing bahin, si Lorenzo 'Chao' Sy, ang amahan ni Michael miingon nga mohimo sila og dugang pang mga pagtuon ang ilang himuon aron ilusad ang Cebu D-League kay maoy gusto sa mga teams nga solido ang ilang komposisyon nga magdala'g tunghaan. (BANAT NEWS)